HAFATRA PASTORALY

Ry Kristiana Havana,

Ny FPMA dia mitory sy manambara ary milaza fa ny Paska mandrapahatonga ny Pantekosta dia : "Fankalazàna ny fitsanganan'i Kristy tamin'ny maty, fandresen'ny Tompo sy izay miaraka aminy ny fahotana sy ny devoly ary ny fahafatesana".

Mora dia mora ny manambara sy milaza izany fa ny zava-dehibe indrindra dia ny fiainana izany izay tsy mandeha ho azy fa mandalo fitsapana maro, fifaliana sy fahoriana, avy any ivelany sy ao anaty.

Ao anatin'izany fiainana miakatra sy midina izany, miankavia sy miankavanana izany dia tsy mamela antsika ho irery fa tonga mihaona amintsika ny Kristy Tompo araka ny tatarantsika sy ny toetrantsika tsirairay avy, na mazoto na kamo, na mendrika na tsia ; ary ambarako amin'ny teny fohy : Tonga ny Tompo.

Tonga ampitiavana ny Tompo : mampitompo ny finoantsika ary mampitambatra antsika ho toy ny ondry taritin'ny Mpiandry izay Tsara, hoy toy ny sampana voaloboka maro eo amin'ny Fototra izay Iray ; ary amin'izany rehetra izany ny Tompo dia mampihaona antsika amin'ny Ray Andriamanitra.

Mora dia mora ny amndre izany saingy mila fanetre-tena tanteraka mihaino ny teny izay lazain'ny Tompo izay teny ampitondrainy ny namanao. Ny tenin'ny Tompo dia ampitondrainy, ampitainy amin'ny namanao (na mendrika aminao izy namanao na tsia, na tianao izy namanao na tsia, na tia anao izy namanao na tsy tia anao) saingy tsy mifangaro amin'ny tenin'ny namanao ny tenin'ny Tompo ; ary na inona na inona teny lazain'ny namanao, ny tenin'ny Tompo izay itany fa sahaza anao dia azavainy sy apetrany ao aminao amin'ny alalan'ny Fahany Masina dia ny hery avy any ivelany izay tsy inona akory fa herin'Andriamanitra Ray sy Zanaka.

Ny fandraisana ny namana dia ny fihaonana amin'ny namana izay tsy inona akory fa ny fiangonana ; ny fandraisana ny namana dia fandraisana ny Tompo saria amin'ny namana izy no miteny ny teny hita maso (ny sakrameta : ny fiombonana ho iray miaraka miray latabatra amin'ny Tompo mizara ny tenany sy ny rany) sy ny teny tsy hita maso (ny teny avy amin'ny Soratra Masina) ; avy amin'ny fihaonana amin'ny namana izay manomboka ao antokatrano ka hatraty ampiangonana no andraisantsika ny Tompo izay mampihaona antsika amin'ny Ray koa mahatonga antsika :

Iaina finaritra na eo aza ny mibahana rehetra sy ny mpampiangana rehetra.

Iaraka iaina finaritra na eo aza ny maha samy hafa satria tsy miaina ho ahy fotsiny aho fa miaina ho an'ny namako ary ianao namako io dia tsy miaina ho anao samy irery fa miaina ho ahy.

Ataontsika nivandravandra izany amin'ny firesahantsika amin'ny Ray, amin'ny fivavahantsika amin'ny Ray ho antsika sy ho an'ny namantsika, ary ataontsika mivandravandra izany amin'ny fiarahantsika mandray andraikitra araka izay talenta ananantsika tsirairay avy satria manana fanantenana ny fisian'ny fitomboan'ny fitoviana eo amintsika isika koa :

" Ataovy tanteraka ary izany, ka tahaka ny nahazotoanareo fony nikasa, dia aoka ho tahaka izany koa ny hahatanterahanareo azy araka izay anananareo. Fa raha misy ny fahazotoana, dia araka izay ananany no ankasitrahana, fa tsy araka izay tsy ananany. Kanefa tsy ny hahatonga fitsaharana amin'ny sasany ary fahoriana aminareo no anaovako izany, fa ny mba hisy fitoviana, ka amin'izao ankehitriny izao ny haben'ny harenareo no hahafaka ny alahelon'ireo, ary ny haben'ny haren'ireo kosa no hahafaka ny alahelonareo, mba hisy fitoviana" : Ny epitsily faharoa ho an'ny Koritianina 8/11-14.

Eny nomena ary manana talenta ianao ka nampiasa izany : nanao hira, nanao vavaka, namangy nitondra teny soa, nitsidika nihaino ny namana, nitondra tsiky, nanadio trano fiangonana, nikolokolo ny fitaovana ilaina ao amin'ny fotoam-pivavahana, nampita vaovao, nidinika sy namolavola ny asa sy ny raharaham-piangonana, nanao vokatra, nanao adidy ara-bola, nanao rakitra ; nataonao ampitiavana sy ampazotoana ho an'ny namanao sy ho an'ny Tompo izany, nataonao araka izay maha izy anao sy ananao izany ary mbola hanohy izany isika satria ampitomboin'ny Tompo sy ampitovian'ny Tompo isika ary koa mankato, manaiky fa Andriamanitra Ray irery ihany no mitombo fa isika mihetry satria izy irery ihany no tsy mitovy amintsika, fa miavaka, fa masina ; ary izay no isehoan'ny maha samy hafa azy manokana, ny voninahiny.

Rakotoarimanana Randranto

Mpitandrina FPMA Bordeaux